للمحجبات.. 8 نصائح للعناية بالشعر

ربط الشعر لفترات طويلة ممكن يسبب التساقط أو تضرر الشعر، لكن لو اهتميتي بشعرك واتبعتي روتين للحفاظ عليه، الحجاب هيساعدك في حمايته لأنه مابيعرضهوش للشمس والتراب والبرد.. جربي النصايح دي:
1-لازم تغسلي شعرك مرتين في الأسبوع أو 3 مرات على حسب إفرازات الدهون من فروة الرأس، الغسل بيجدد الخلايا في فروة الرأس وبيمنع تساقط الشعر.
2-اهتمي بنظافة حجابك علشان مايتسببش في زيادة الأتربة في فروة الشعر وبالتالي التساقط.
3- اربطي شعرك بطرية خفيفة، ابعدي عن شده جدًا بالأستيك لأنه بيقطعه من تحت الحجاب.
4- البسي البندانة في اتجاه مريح لنمو الشعر، لو حسيتي بألم في فروة الرأس غيري تسريحة شعرك لأنها بترهق الشعر.
5-اهتمي بالأكل الصحي والمكملات الغذائية وشرب السوائل علشان صحة شعرك.
6- اعملي ماسك أو حمام زيت مرة كل أسبوع أو أسبوعين.. ممكن من زيت جوز الهند والزيتون والخروع، بيتقلوا الشعر.
7- فكي شعرك جوا البيت ووقت النوم، لأنه بيحتاج يتنفس وياخد حريته.
8- قصي الأطراف كل 45 يوم علشان التقصف يقل.