تصرفات بيتعامل معها الرجالة بمنطق ”أحبك..أكرهك”

تصرفات أغلب الرجالة ملهاش كتالوج، وكل ما ترضيه تلاقيه بيقارنك مع ست تانية في مكان ما من العالم بتعمل حاجة أحسن منك. حيرتهم دي بتبقى أكتر من حيرة عمرو دياب وهو بيقول: "أحبك أكرهك.. أسيبك أندهك. أعلق نفسي بيكي ولا أعمل فيكي إيه؟!".. جمعنالكم عدد من تصرفات محيرة بيعملها الرجالة، واللي لسان حال البنات عليها ممكن يكون " إنت ماقولتش ليه من الأول إن هواك يا حبيبي كده"..

• تكوني شيك وفي نفس الوقت مش شيك أوي
   
  يكون حبك علشان لبسك واهتمامك بنفسك، لكنه مش عايزك تهتمي بنفسك أوي علشان بيغير عليكي، وبعد الجواز خصوصًا بتبدأ التعليقات على اللبس اللي كان عاجبه قبل كده، وتقلب على نيللي كريم من باليرينا لمنقبة محبوسة في البيت.
  
  
• اعتمدي عليه بس اعتمدي على نفسك
  
  ده بيمثل شخصية "بلبل" في فيلم "بلبل حيران"، مابيحبش البنت المستقلة اللي لها قرارها لأنه الراجل المسئول، بس بيكره البنت الزنانة اللي معتمدة عليه في كل حاجة لأنه مش دادة.. ويفضل رايح جاي ما بين الاتنين.
  
  
• ماتخنقنيش بالغيرة/أنتي مابتغيريش عليا ليه؟
  
  الغيرة من أهم أسباب انهيار العلاقات العاطفية، خصوصًا لما الست تبقى شكاكة زيادة عن اللزوم وتفضل متتبعة الراجل طول الوقت. فالمفروض هنا إن الراجل بيحب الست الواثقة اللي مابتغيرش، لكن عمليًا ده مش حقيقي لأنه هيعتبرك مش مهتمة.. وده كان جزء من "بلبل حيران" برضه.
  
  
• اهتمي بنفسك بس ماتصرفيش فلوس وماتطلعيش برا البيت
  
  بيمجد طول النهار في كل ست حلوة بيشوفها في التلفزيون وعايزك تتعلمي منهم بس في نفس الوقت ماتروحيش الجيم ولا تدفعي فلوس في الكوافير علشان هي مش فلوس على الأرض.. ابقي حلوة ذاتيًا كده بالتنمية البشرية، بس كل محاولاتك هتقلب لأم عبير.
  
  
• ماتشتغليش بس شوفي حاجة تشغلك
  
  في البداية بيقولك إنه عايزك مرتاحة في بيتك فبلاش شغل وبهدلة، أو إنه بيغير عليكي ، لكن بعدها مابتسمعيش غير "شوفي حاجة تشغلك"، "إيه الفراغ اللي أنتي فيه ده"، "ما أنتي مابتعمليش حاجة طول النهار".