أنواع البنات الـ”سنجل” في الفلانتين

عيد الحب أو "الفلانتين"، يعني اللون الأحمر في كل مكان، تاجات على فيسبوك وقلوب ودباديب من المرتبطين لبعض، وكتير من الـ "محدش يقدر يفرقنا عن بعض أبدًا يا عمري"، لكن حال السناجل بيبقى مختلف ولهم أنواع.. وهي:

1-المنفسنة:

دي بتصحى اليوم ده قابلة وشها، كل ما تشوف دبدوب أو شنطة هدايا تتقمص دور "قاسم السماوي" وتقول "جاتنا نيلة في حظنا الهباب"، وممكن "تزغر" لأي اتنين هتعدي عليهم طول اليوم.. كل ده مع كونها بتـ"React" بقلوب على بوستات صحبتها المرتبطات عادي.

2-الناشطة:

دي هترفع شعارات كتير، هي أصلا بتكره الرجالة وأي حاجة جايه منهم، ورغم إن ممكن يكون عندها حق تكرههم في أوقات كتير، بس مش لدرجة فلسفة اليوم وقلبه لمناقشة عميقة عن معاني الحب وانزواء وانسحاق المرأة في رغبات الرجل.. الموضوع أبسط من كده وكلنا هنموت.

3-ولا الهوا:

دي مش فارق معاها حاجة فعلًا، مابتفرقش بين الفلانتين وعيد تحرير سينا، كله واحد يعمل اللي يريحه، اللي عايز يحتفل براحته واللي مش عايز هو حر، أهم حاجة تروح تلاقي مامتها عاملة صينية بطاطس باللحمة.

4-المتدينة:

أول ما تصحى من النوم وتشوف إن النهارده 14 فبراير، بيكون نفسها تشد ميكروفون الجامع وتزعق "الفلانتين أصلًا حرااااااام"، هيبقى حلال أول ما ترتبط إن شاء الله.

5-الأسامة منير:

بتبقى مجهزة نفسها في اليوم ده لتلقي شكاوي أو حكايات صاحبتها المرتبطات، اللي خطيبها ما جابش هدية، واللي صاحبها خرجها خروجة أحلامها، وتسمع الكل وتطبطب وتشارك الفرحة وتنام قريرة العين، كواحدة أدت واجبها في الحياة.