7 تصرفات متتسامحيش معاهم.. منهم الـ”Body Shaming”

صحيح مفيش حد كامل أو مثالي، والسعي ناحية علاقة مثالية مفيهاش اختلافات ومشاكل هي فكرة مش حقيقية أبدًا، بالعكس الخلافات جزء طبيعي من أي علاقة إنسانية، والفكرة كلها في طرق تخطي وحل المشاكل مش الاستسلام قصدها.. لكن في نفس الوقت ساعات المشاعر تجاه شريك الحياة بتعمينا عن إدراك أذى بعض التصرفات، واللجوء لخلق أعذار ومبررات بسبب الخوف من المواجهة أو التعود أو حتى الخوف من الوحدة، وده مع الوقت بيراكم مشاعر سلبية كتير، وأفكار مغلوطة عن نفسك وتقديرك لذاتك وإحساسك بيها.. وعلى مدى أطول ممكن يكون سبب في مشاكل نفسية أكبر وأصعب.

أيوة مفيش كتالوج واحد للعلاقات والبشر، والمناسب لشخص مش بالضرورة يكون مناسب للتاني، وكل علاقة لها خصوصيتها وتفردها.. بس برضه في حاجات واضحة ومشتركة ما بين البشر ماينفعش تهوينها.

 
تصرفات ماتقبليهاش في علاقاتك العاطفية

دي تصرفات ممكن يعملها شريك حياتك مش لازم أبدًا تتسامحي فيها أو تعديها وتعتبري إنها شيء عادي أو بسيط، لأن ده مش حقيقي ولأنها مدمرة ومفيهاش مجال للشك أو التبرير.. ومنها:

1-الابتزاز العاطفي

الابتزاز العاطفي واحد من أسوأ صور الاستغلال في العلاقات العاطفية، ومن الطرق اللي ممكن جدًا ماتكونش واضحة وسهل إدراكها بالنسبة لكل الناس. الشريك المبتز عاطفيًا بيحملك مسئولية أي شيء سلبي بيحصل له أو للعلاقة، وطول الوقت طلباته مش مجردة بالعكس مشروطة ومابتراعيش حالتك النفسية، ولو حصل ورفضتي بتتعاقبي بكل التصرفات الكويسة اللي عملها قبل كده، أو إطلاق صفات سلبية عليكي زي إنك أنانية مثلًا، وفي حالات تانية بيكون استخدام الشعور بالذنب هو سلاح الطرف المُبتز.. وبالتالي تكون كل تصرفاتك مش نابعة منك لكن بسبب الرغبة في تجنب العواقب اللي بينذرك بيها.
اتكلمي مع شريكك واشرحي قد إيه ده سلوك مضر ليكم وللعلاقة، ومتأجليش المواجهة علشان مع الوقت مش هيكون عندك طاقة لأي حاجة وهتلاقي العلاقة بتنهار في نفس الوقت. 

via GIPHY

2-العنف الجسدي

العنف بكل أشكاله شيء مش مقبول أبدًا، ومينفعش تتسامحي فيه بأي حال من الأحوال.. لو كان شريكك بيعرضك لعنف لفظي أو جسدي، ممكن يكون اختيار إنهاء العلاقة بشكل مباشرة مش متوفرة بالنسبالك بسبب ظروف اقتصادية –لو كنتِ معتمدة عليه ماديًا- أو اجتماعية –وجود أطفال أو خوف من الوحدة-.
ماتقبليش العنف جواك في البداية، وماتتسامحيش فيه أو تحسي إنه بسبب غلط عملتيه.. اقبلي حقيقة إن مش من حق أي حد يمارس العنف ضدك، وإن ده سبب كافي جدًا لإنهاء العلاقة دي مهما كانت مبررات الطرف التاني.. خدي وقتك في ترتيب أمورك وحياتك وممكن تلجأي لطلب المساعدة من الأماكن المتخصصة زي صندوق شكاوى العنف ضد المرأة في المجلس القومي للمرأة.

اقرئي أيضًا: أشياء لنجاح العلاقة العاطفية أهم من الحب

3-الـ Body shaming

ممكن شريكك يقلل من شكل جسمك بأي طريقة أو يقارنك بست تانية، ده اسمه Body shaming وهو الخجل والتقليل من شكل الجسم/لونه/وزنه بحجة إنه مش مثالي بمقاييس الإعلانات والمجلات اللي طول الوقت بتفهمنا إنك جميلة لو بشرتك مفيهاش غلطة، وجسمك مشدود، وبمقاس ووزن معين، والأفضل يكون لونك فاتح.. وتبدأ فكرة المثالية تضغط عليكي.
شريكك ممكن يجري ورا مثالية مش موجودة في الأصل، ويحسسك دايمًا إنك قليلة/وحشة/ماتستحقيش، وقتها حبك لنفسك وتقبلك لها بيقل وممكن يتطور لمشاكل نفسية توقف حياتك كلها.

اللي لازم تعرفيه إن مفيش حد مثالي غير على الـPhotoshop، والـStretch marks  والتجاعيد والسلوليت، حاجات طبيعية بتحصل لكل الستات حتى النجوم اللي بتشوفيهم Perfect، وإن جسمك ملكك أنتي وبس ووزنك شيء يخصك ومهم بس علشان صحتك، وإن جمالك في إنك تحبي نفسك زي ما هي.

via GIPHY

4-الاستخفاف بطموحك المهني

مستحيل تكوني في علاقة صحية مع شريك بيقلل طول الوقت من شغلك ومجهودك وطموحاتك. وهنا فيه فرق ما بين تقديم الملاحظات على طريقة شغلك، وأحيانًا التعبير عن الضيق من تخصيص وقت أطول للشغل على حساب الحياة العاطفية، وبين الاستخفاف والاستهتار بأي إنجاز بتعمليه، أو حتى عدم إظهار الدعم والحماس أو الشعور بالسعادة.
دعم شريكك مش حاجة بسيطة ممكن تستغني عنها والدنيا تمشي وخلاص، دعمه مهمة جدَا لأنه بيزود ثقتك بنفسك وعلشان استمرار العلاقة وقوتها على المدى البعيد.
لو كنتِ في علاقة الطرف التاني بيعرضك للتقليل من إنجازاتك، فأنتِ محتاجة تتكلمي معاه بشكل واضح ولو استمر الوضع فكري في إمكانية استمرار العلاقة، وهل بعد سنين مش هتندمي على ضياع وقتك وحياتك؟

اقرئي أيضًا: دروس في العلاقات اتعلمناها من فيلم You've got mail

5-إبعادك عن العيلة والأصدقاء

علامة خطر كبيرة في النقطة دي.. لأن كتير ممكن يعتبروها شيء طبيعي، أو تصرف نابع من خوفه عليك أو غيرته من أصحابك واهتمامك بيهم، وفي الحالة دي ماينفعش تعتبري ده شيء إيجابي من الأصل لأنه نوع من السيطرة والتحكم واعتبارك شخص غير مسئول أو ناضج علشان يقرر علاقاته الشخصية. أو يكون بيعتبرهم تهديد شخصي له، لأنهم ممكن يعرفوكي سلبيات العلاقة مثلًا.
طبيعي أوقات يكون عند شريكك ملاحظات على حد من أصحابك لأن مش دايمًا بيحصل نفس "الكيميا" بين الناس، وفي الحالة دي بيكون قرارك الشخصي يا إما تبعدي خطوة عن الشخص ده أو مايكونش فيه تواصل ما بين شريكك وبينه.. لكن إن العلاقة العاطفية كلها تكون قايمة على قواعد صارمة تكلمي مين وتبعدي عن مين فده مش شيء صحي على الإطلاق وبيخليكي وحيدة وبيبعدك عن داويرك الآمنة.

via GIPHY

6-عدم احترام الحدود

إنكم شريكين حياة مش معناه أبدًا إن مفيش حدود ما بينكم أو مساحات شخصية. ممكن شريكك يغفل النقطة دي ويبدأ في السخرية من مشاعرك أو من تجربة مؤلمة سابقة، أو حتى يتكلم بأريحية عن حاجات تخصك قدام الأهل والأصحاب بشكل بيخليكي مش مرتاحة أبدًا.. لازم تتكلمي عن مشاعرك في حالة تصرفات زي دي وتبين قد إيه هي مش حاجة عادية.

اقرئي أيضًا: ليه المفروض مايبقاش عندك ريليشن شيب جولز؟

7-ثقافة اللوم

لو كنتِ دايمًا في نظر شريكك غلطانة في أي تصرف، وده ملوش علاقة بفكرة النقد، لكن اللوم المستمر لأي سبب في حاجات ماينفعش توجهلك أي لوم فيها.. زي التحرش مثلُا، اعتباره بسبب لبسك/طريقتك شيء مش مقبول أبدًا.. وماينفعش تقتنعي بيه.

وزي ما قولنا قبل كده، كل علاقة لها خصوصيتها.. ومعنى عدم التسامح مش لازم يكون إنهاء العلاقة أصلًا لكن ماينفعش تعتبري التصرفات دي طبيعية وتعديها أو تحملي نفسك مسئوليتها.

اقرئي أيضًا:

عادات سيئة عليك التخلص منها كامرأة ناضجة

بعد العلاقات "التوكسيك" هذه المخاوف تسيطر عليك

10 أنواع إنسكيوريتي بتعيشها الستات بشكل مستمر