15 حاجة مش مهمة في جهاز العروسة

زمان جدتي قالتلي " البيت هو اللي بيخدمنا مش احنا اللى بنخدمه " ، يعنى مينفعش نتحمل تكاليف أكثر من طاقتنا عشان البيت المفروض نرتاح فيه .

البيت هو المكان المريح اللي بنقدر نتعرى فيه من مشاكلنا ، و البيت برضو هو المكان المرتب البسيط ، مش اللى مليان بكراتين وحاجات مستحيل نستخدمها دلوقت ، بس عشان خايفين من الضيوف وآرائهم واللى ممكن يقولوا " انتي مجبتيش نيش ليه " ، لا ده بيتى مش مكان أستقبل فيه مثمنين لجهازى ، يقولوا ده بكذا وده ، ده كان فى أغلي منه ، ومجبتيش الطقم الفلاني ليه ...

لما بدأت أجهز نفسي ، سألت بنات كتير أتجوزوا إيه الحاجات اللي جبتيها في جهازك وندمتي أنك جبتيها ؟، معظمهم أجمعوا أن كل بيت ليه إحتياجات بتختلف من مكان لآخر، والعروسة المفروض تجهز بيتها لفردين فقط هي وجوزها ، لانها هتحتاج وقت وجهد مضاعف للتنضيف وده ممكن يكون صعب وخصوصا لو هي ست عامل.
 

حاجات ملهاش لازمة في جهاز العروسة

1- النيش

عقلي مش قادر يستوعب اني هجيب طقم صيني ب 8 ألاف جنيه ومش بس كده هجيب بدل الطقم 5 زي طقم  كاكاو وطقم أكروبال وأطقم مختلفة بأسماء خزعبلية ، يعني بمعدل 40 ألف جنيه ، عشان يتحطوا ف النيش ويتقفل عليهم مدي الحياه ، ده هيبقي بيتي ولا مزار سياحي ، الحقيقة اللي وصلتلها ان ال 40 ألف جنيه ده تعملوا بيه انتي وجوزك مشروع أفضل مليون مره من نيش .

2-أوضة الأطفال بمحتوياتها

من معظم الحاجات اللى البنات أكدتلى أنها مش مهمة فى بداية الجواز ، والمفروض نبدأ نجهزلها لما الأطفال يكونوا موجودين.

3-     طقم فطار vsطقم عشا vs  طقم خشاف vs طقم جاتوه vs طقم جيلي Vs طقم آيس كريم  .

صاحبتى بتحكيلى ، أنها وهي بتقدم آيس كريم للضيوف كانت مستعجلة ، فقدمته فى طقم خشاف ومأخدتش بالها غير بعد ما الضيوف مشيوا ، بتقولى استغربت قوي ، طب ليه جبت كام طقم والاستخدام واحد ، بتقولى بعدها بفترة إبنها كسر من طقم الآيس كريم ، فراحت عشان تشتري واحد جديد ، البياع اعطها طقم جيلى على أنه آيس كريم ....

اقرئي أيضًا.. 10 نصائح للحصول على صور زفاف مميزة

4-     طقم استانلس vs طقم تيفال vs طقم سيراميك vs ألومنيوم Vs طقم جرانيت

الأسطورة بتقول أن العروسة لازم تجيب كل الأطقم دى وفي الآخر تروح تشتري شوية أطقم مقاسات عشان دول عمليين وهيساعدوها ، معظم اللي أعرفهم أجمعوا أننا ممكن نستغني عن كل الأطقم دي ، ونركز في الحلل المقاسات من النوع اللي احنا عاوزينه .

5-     شنطة المعالق vs  شنطة السكاكين

بنت خالتى بعد الجواز بشهر باعت الشنط دى ، لأنها فعلا مش عملية وبتاخد مكان و مجهود تنضيف على الفاضي . 

6-     الأجهزة الكهربائية

غسالة أوتوماتيك vs غسالة أطفال vs  غسالة غسالة نص أوتوماتيك

طب ايه فايدة الغسالة الأوتوماتيك والنص الأوتاميتك ، الاتنين بيغسلوا هدوم تقريبا ، ده غير إن الطفل مش هيعترض لو غسلتى هدومك معاه .

7-     مفرش ليلة الدخلة

99.9% من  البنات أجمعوا أنه ملوش أي لازمة ، حتي يوم الفرح ، معظم العرايس بيشلوه عشان يعرفوا يناموا ، طب ليه ندفع مبلغ وقدره في حاجه مش هنستخدمها .

اقرئي أيضًا.. 15 فكرة لهدايا يمكنك تقديمها لصديقتك العروس

8-     علبة الميكب الكبيرة

الميكب ليه صلاحية حوالى 4 شهور ، ليه نجيب كميات ضخمة وهتترمى فى الآخر .

9-     العدد المهول من أطقم الملايات

واحده صحبتي أكدتلي أن مامتها  وهي بتجهزها  أشترتها طقم ملايات ، أسعار الأطقم بتترواح من 600 إلي 850 ج  يعني حوالي 40 ألف جنيه بس سعر أطقم الملايات ، أنا عقلي مش قادر يستوعب أني هنام علي 40 ألف جنيه ، صحبتي أكدتلي أنها بعد الجواز بفتره باعت الملايات لمحلات المفارش لانها مع الوقت بتتركن في الدولاب وبتعمل زحمه .

10-  مفرش صيفي vs  مفرش شتوي

معظم المفارش ... الأمهات والبنات اللى لسه متزوجة بتشيلها عشان يعرفوا يناموا ، ليه بقا ندفع فلوس فى حاجات ملهاش إستخدام .

11-  الهدوم الكتير واللانجيري الكتير

فى احتماليية أنك تحملى بعد الزواج بشهر أو شهرين .. جسمك هيزيد أكيد وبالتالى الهدوم دى مش هتتلبس .

12-  ستاير المطبخ والحمام

الكل أجمع انها مش عملية إطلاقا .. لأن في بعض الناس بيستخدموا الخامة العادية للمطبخ والحمام ، وده طبعا مش مناسب لبيئة الحمام والمطبخ .

13-  أوضة السفرة

أوضة السفرة مش مهمة ، ولكن المفروض نختار تصميم صغير يكون مثلا فى الصالون ، أما السفرة كأوضة تكاليف على الفاضي

14-  الطقم الصيني

طقم الصينى ابو 10 آلاف جنية ده ، أكيد مش مهم ، وممكن نستغنى عنه .

اقرئي أيضًا.. قائمة جهاز العروسة التي تحتاجينها لبيتك

15-  الكيتشن ماشين

مش عملية و جودتها مش عالية ، وفيها أجزاء فيها مش بتستخدم ، الأفضل نشترى إحتياجتنا بس.

في النهاية و أنت بتختاري جهازك ، أختاري المناسب والمفيد ليكى  ، وإرفعي ديما شعار " أعطوني ال 100 ألف جنية ويذهب النيش وطقم الصينى و الملايات إلى الجحيم "  .

اقرئي أيضًا..

مكياج عرائس 2019 ونصائح لاختيار اللوك المناسب

15 نصيحة للعرائس عند اختيار فستان الزفاف

نصائح للاستعداد النفسي للزواج