بيت أدفى.. حيل لمواجهة برودة الشتا

الشتاء فصل ممتع جدًا لعدد كبير مننا، فرغم البرد واللبس التقيل، إحساس الدفا والأمان دايمًا ممتع. بس أكبر مشكلة بتواجهنا في الشتا هو إن البيت بيكون برد جدًا، وعلشان نتنقل ما بين أوضة وأوضة بتكون عملية في غاية الخطورة وبتتطلب استعدادات كتير، وللسبب ده هنشارك معاكم نصايح هتساعدك عى تدفئة البيت جربناها وجابت نتيجة كويسة جدًا، جربوا النصايح دي واستمتعوا بشتاء دافي وممتع خصوصًا في أيام الأجازات مع أفلامكم المفضلة..

1-اختيار الإضاءة

نصيحة مشمك تبان عادية ومش هتعمل فرق، لكن هي جزء مهم من الإحساس بالدفا، العقل بيفسر الألوان اللي حواليه وبيترجمها لإحساس، فلو بيتك كله ألوان من درجات الأبيض والأزرق والإضاءة كلها فلورسنت هتحسي ببرد أكتر من لو الإضاءة برتقالي لأنه لون دافي وشبه نور الشمس، وكمان اللمبات دي بتطلع حرارة أكتر وبتدفي الجو، غير إنها أشيك في الديكور.

 2-السجاد

الأرضيات وخصوصًا السراميك والبورسلين بتحتفظ بالبرودة بشكل كبير، علشان كده لازم تغطي الأرضية بشكل كامل بالسجاد علشان يقلل من البرد اللي بيخرج من الأرض، اختاري أنواع سجاد كويسة وفيها نسب أقل من الألياف الصناعية.. وماتنسيش تختاري سجادة صغيرة للمطبخ وواحدة للحمام، لو كان حمامك فيه بانيو منفصل وجاف.

اقرئي أيضًا: أفضل أنواع الدفايات المنزلية في الشتاء

3-الشموع

الشمع مصدر تدفئة متتخيلهوش، شمعة جنب الكومود عندك أو على مكتبك هتغير المود كله وهتمنحك دفا عظيم، جربي تحطي شمع في أوضتك، والأفضل يكون له ريحة بتقلل التوتر وبتهدي الأعصاب ومناسبة لجو الشتا زي ريحة القرفة أو الفانيلا مثلًا، بس خدي بالك يكون موجود على حامل علشان مايسببش أي مشاكل، واطفيها قبل النوم طبعًا.
هتلاقي شموع معطرة موجودة في كوبايات زجاج في محلات كتير.. سعرها مناسب وريحتها حلوة جدًا.

اقرئي أيضًا: أفضل إكسسوارات ملابس الشتاء لتكملي إطلالتك الجميلة

 4-ضوء الشمس

بيقولوا إن "شمس الشتا عزيزة" علشان كده لما تلاقي الشمس موجودة بالنهار، لازم تستغلي الفرصة وتفتحيلها البيت لأن الجدران هتحتفظ بحرارتها شوية وهتجدد الهوا اللي جوا البيت، افتحي الشبابيك حوالي ساعة، وبعدها اقفلي كويس واستخدمي ستاير تقيلة على الشبابيك والبلكونات، واتأكدي من قفل فتحات الشفاط.. علشان تحتفظي بالحرارة لأطول فترة.

 
5-شغلي الفرن

كلنا عارفين إن الأكل والشتا متلازمين بشككل كبير، ومن أكتر الحاجات اللي بتدفينا وبتدفي البيت نفسه هي تشغيل الفرن، والدفا بيبقى مضروب في اتنين لو بتعملي كيك أو أي نوع مخبوزات لأن ريحتها بتهدي الأعصاب، وكمان هي مكافأة حلوة في نهاية يومك.. لو مابتعرفيش تعملي كيك اشتري الميكس الجاهز.. كمان ممكن تخليها بطاطا مشوية أو تعملي سينابون وريحة القرفة اللي فيه كفيلة تحسسك بالدفا في كل ركن من البيت.

 6-مفارش تقيلة

غيري مفارش السراير لحاجات ليها وبر من الصوف، زي الدفايات أو حتى البطاطين، وبلاش الملايات العادية، وكمان اهتمي بأغطية المخدات وخليها من القطيفة مثلًا.. اللحاف الفايبر أساسي في الشتا بس اختاري نوع كويس لأنه خفيف وبيدفى جدًا.

اقرئي أيضًا: كيفية العناية بالبشرة الدهنية في فصل الشتاء

 7-الأكل

الأكل هو مصدر الطاقة الأول طبعًا، وفي أكلات بتدي طاقة وبتحسس بالدفا لكن اهتمي بنوعية الأكل مش الكمية علشان وزنك مايزيدش، اختاري الخضار والشوربة وخصوصًا السبانخ والقلقاس والمحشي والعدس، وكمان البهارات والشطة مهمة لأنها بتجري الدورة الدموية وبتزود إحساس الدفا، واشربي جنزبيل وقرفة ونعناع بس وقفيهم قبل النوم بشوية علشان دخول الحمام في البرد بيبقى صعب.

 
8-طقوس قبل النوم

وعلشان تستمتعي بنوم هادي لازم يكون فيه طقوس ليكي في الشتا، زي إنك تحرصي على اللبس القطن لأنه بيحتفظ بدرجة الحرارة، وتعملي حمام مايه دافية مع الملح الإنجليزي لرجلك، وبعدها تنشفيها كويس وتدلكيها بكريم وده هيجري الدورة الدموية، وبعدها تلبسي شراب تقيل من المخصص للشتا.. وتقعدي في سريرك قبل معاد النوم بشوية علشان المكان يبقى أدفى.. شتا سعيد.

اقرئي أيضًا:

نصائح هتساعدك ماتتخنيش في الشتا

أهم موضة شتاء 2019 من أفضل الماركات

كيفية تنسيق ملابس المحجبات في الشتاء