البريك في العلاقة العاطفية.. قرار صح ولا مؤذي؟

في أوقات بنحتاج لوقت نبعد فيه عن الطرف التاني، بنحس اننا مستنزفين ومشاعرنا مرهقة، رغبتنا مش الانفصال، ولكن فترة راحة أشبه بـ "البريك"، كأننا بنبعد عشان نقيم العلاقة ونفكر فيها بزواية مختلفة، وممكن يكون بسبب احتياجنا لفترة بعيدة عن المشكلات والضغوط والمسئوليات اللي بتجبرنا نتصرف مع بعض بتحدي وقسوة أحيانا، وبيتوه حبنا لبعض.

البريك في العلاقة

via GIPHY

خطوة "البريك" في العلاقة، عشان تحصل لازم يكون في مجموعة من الحاجات اللي أجبرتكم عليها، ولازم تكون قرار اتفقتم أنتو الاتنين على اتخاذه، وتعتبر مخاطرة كبيرة، لأنه كتير من قرارات "البريك" بتنتهي بالانفصال وإنهاء العلاقة، بعد ما في طرف بيقيم العلاقة ويشوف أنها انتهت، وأنه مش هيقدر يكمل، أو يسأل نفسه "طالما قدرنا نبعد فترة، يبقى أكيد نقدر نكمل حياتنا من غير بعض".

الفكرة هنا أنه البعد فترة للراحة أو إعادة التفكير وتقييم العلاقة مربك وغير محدد إمتى يكون في صالح علاقتكم سواء كنتم زوجين أو مخطوبين أو مرتبطين، وإمتى يبقى قرار خطأ وهدم للعلاقة، يمكن يكون ميزته أنه تقدروا ترجعوا في قراركم، أو فرصة تتخلصوا من تشويش كتير في العلاقة، وتفكروا بجدية وحزم.

فإذا حصلت، وقررتِ أنتي وشريكك أنكم محتاجين لـ "البريك"، دي مجموعة من النصائح اللي ممكن تدلك إذا كان قرارك صحيح، وتنبهك لإشارات تاخدي بالك منها، وتعرفي إمتى القرار هيؤدي لنتيجة مش عاوزين توصلوا لها.

وقبل ما تتخذوا القرار، في أمور من الواجب أنها تكون واضحة ما بينكم، بمعنى أنكم تضعوا حدود معينة لفترة البريك ومدتها، وتختاروا إذا كان خلال الفترة دي هيكون في أي نوع من أنواع التواصل ما بينكم أو لأ؟ وتوضحوا- ودي أهم نقطة- إذا كان مسموح لأي طرف منكم أنه يتعرف على أشخاص تانيين ويجمعهم ببعض علاقة أو لأ؟ ومن المهم أنه في النهاية يعبر كل شخص عن رأيه ورؤيته للعلاقة بصراحة.

إمتى يكون البريك قرار صح؟

اعرفي المواقف اللي البريك وقتها بيكون القرار السليم، عشان تقيموا العلاقة وتحددوا مشاعركم:

الخناق المستمر

إذا كانت العلاقة بدأت تتجه في طريق الخناق المستمر على أي كلمة أو تصرف، وأصبح كل موضوع بيبدأ بنقاش عادي بيتحول لجدال وينتهي بخلاف، وكأنكم فقدتم القدرة على التواصل وتفهم وجهات نظر بعض، والموضوع كله بقى بيدور حول فوز طرف على التاني، وفقدان المعنى الحقيقي للعلاقة العاطفية القائمة على شريكين بيتفهموا ويستوعبوا بعض.

الاستعداد للإلتزام

من الممكن أن يكون في طرف عنده خوف من الإلتزام، وغير مستعد أنه يأخد خطوات جدية، وكل تصرف ناحية أنه العلاقة تأخد شكل رسمي بيوتره ويقلقه، في حين ممكن يكون الطرف التاني متحمس وشايف مستقبل للعلاقة مش حقيقي، عشان كده لازمفترة تبعدوا عشان مشاعر كل شخص تكون محددة وواضحة وقادر يقيمها، ويكون قرارهم النهائي إما بالانفصال أو إبطاء الأمور وعدم التسرع عشان يكون الطرف الخائف من الالتزام قادر يستوعب الأمر.

الخيانة

via GIPHY

طبعا، خيانة طرف للتاني في العلاقة العاطفية واحدة من أسوأ الأمور اللي ممكن تحصل ما بينهم، وبتفسد المشاعر، وبتهز ثقة الشخص في نفسه، وبيسيطر عليه الشعور بعدم الأمان، ورغم أن القرار بالانفصال يبدو واضح وقاطع لناس كتير، في ناس بتحتاج وقت أو "بريك" عشان يقدروا يشوفوا الموضوع من غير ضغوط ويقيموه، ويختاروا الطريقة اللي هتناسبهم في التعامل معاه، فهل هينهوا العلاقة دي، ولا هيسمحوا بفرصة تانية؟ 

عدم الرضا

إذا شعرت أنك غير راضية عن علاقتك العاطفية، فده مؤشر واضح أنه في حاجة غلط، وعشان كده التعامل الأفضل مع مشاعر عدم الرضا والسعادة، خاصة لو استمر لفترة طويلة، هو الوضوح وطلب "بريك" تقدر تشوف فيه العلاقة من بره وتعرفي مصدر عدم شعورك بالرضا، وتتأكدي من مشاعرك ورؤيتك الحقيقية لعلاقتك العاطفية، عشتن يكون قرارك النهائي في محله وغير متسرع.

إمتى البريك يكون مؤذي؟

via GIPHY

في حالات مواقف تانية، بيكون "البريك" فيها قرار غير سليم، وغير مناسب، ومنها:

حيلة للفوز

بالتأكيد، محدش يحب أنه يخسر أي معركة حتى لو كانت تافهة وبسيطة، ولكن استخدام وسائل وحيل لتحقيق الهدف ده، بتكون العواقب شديدة ومفجعة أوقات، بمعنى إذا اخترت "البريك" لأنك متأكدة أنه موقفك أضعف في مناقشة أو جدال حول موضوع بيهمكم أنتم الاتنين، واعتبرتِ أنه البعد لفترة فرصة للهروب وطريقة لكسب أرض جديدة، عشان تكون في موقف قوة، وترجعي تتحكمي في العلاقة، وده ممكن يؤدي لإنهاء العلاقة بالأساس، ويخسرك كل حاجة.

طريقة للتعرف

إذا كان "البريك" هدفه أنه يكون وسيلة للتعرف على أشخاص تانيين، وإقامة علاقات معاهم، دون أي اعتبار للطرف الآخر، والاستهانة بمشاعره واستخدام البعد كحجة أو تصريح للدخول في علاقات مختلفة من غير وجود إلتزام ، وكأنه فرصة مجانية للخيانة من غير حساب.

وجود حل

المشكلات أمر طبيعي في العلاقات العاطفية، لكن "البريك" مش هو الطريقة لحلها أو التعامل معها، لأن أفضل وسيلة هي التواصل المباشر والنقاش والوصول لحل مُرضي ومناسب، لكن الاستسهال بالبعد بيفاقم المشكلة ويكبرها، ويخلق مشاعر سلبية تجاه كل طرف.. عشان كده اتكلموا وافتحوا قلوبكم وخليكم صادقين.

في النهاية، قراركم بضرورة "البريك" والبعد هيكون ليه اعتبارات متعلقة بيكم وبشكل علاقتكم، وأنتم الوحيدين اللي قادرين تحددوه، المهم يكون اختياره حرص منكم على العلاقة والحب اللي بيجمعكم.

اقرئي أيضا:

ما هي طبيعة العلاقات الصحية؟

علامات بتقول لك إنه مش الزوج المناسب 

أشكال الدعم التي تحتاجها المرأة من الرجل