في وقت العزل.. 6 نصائح تحافظ على علاقتك العاطفية

في الوقت الصعب اللي بنعيشه، واللي اضطر كل حد فينا أن يفقد فيه التواصل مع الناس اللي بيحبهم، ويستغنى عن أنشطة كتير كان بيقوم بيها يوميا عشان يقدر يحافظ على حياته، بتكون علاقتنا العاطفية على المحك، ويعتبر أنه ده وقت اختبار حقيقي لقوة حبنا لبعض، واهتمامنا الفعلي بالطرف التاني.

اقرئي أيضا: قبل الدخول في علاقة عن بعد.. اعرفي هذه الأمور

العلاقة العاطفية وقت العزل

العلاقات العاطفية في زمن كورونا

الموضوع ممكن جدا يشبه العلاقات العاطفية عن بعد، اللي بيكون فيه طرف في بلد بعيدة عن التاني، وبيضطروا يلجأول لطرق يتعاملوا بيها مع الوضع الجديد في حياتهم، ولكن الظروف الحالية اللي بنمر بيها، ممكن تكون فرصة تُظهر أسوأ ما في الأشخاص وأحسن ما فيهم كمان، لأنها أوقات مليانة خوف وقلق وتوتر، ومواجهة لمستقبل مجهول محدش عارف ملامحه ممكن تكون عاملة إزاي.

وإذا كنتي في علاقة عاطفية، أكيد واجهتك أسئلة كتير، وعانيتي أنتي والطرف التاني من التخبط، بعد ما أصبحتم مضطرين تكونوا في عزل اجتماعي بسبب الوضع الصحي، ومش قادرين تشوفوا بعض، غير أنه كل طرف قلقان على التاني، ومش متخيلين علاقتكم هتنجح وتكمل، ولا دي النهاية؟

دي مجموعة من النصائح اللي ممكن تساعدكم تتخطوا الفترة دي بنجاح.. اتبعوها وشوفوا النتيجة:

1.طمنوا بعض

via GIPHY

في الوقت ده، التعامل بخوف وقلق وهلع بصورة متزايدة، هيسبب ضيق للطرف التاني، فلازم كل حد فيكم يكون هاديء وقادر يتحكم في أعصابه، ويطمن الطرف التاني، وميكونش سبب لإزعاجه وقلقه أكتر، يعني مفيش داعي لمخالفة الأجراءات المتبعة على كل الناس والنزول والتعامل مع الوضع باستهانة، فيحس الطرف التاني بالمسئولية، وضرورة أنه يمنعك ويشعر بالقلق عليك.

كمان ضروري أنكم توضحوا لبعض الإجراءات وأهم طرق الوقاية، وتطمنوا على صحة بعض من وقت للتاني، من غير مبالغة وتهويل، أو تقليل من الوضع وتهوينه، لكن الاعتدال هو الأهم، ولو في حد انتابته أي نوبات هلع، يحاول الطرف التاني يكون جنبه ويطمنه ويهديه.

2.التواصل

via GIPHY

مش معنى أنكم مش هتتقابلوان ومش هتقدروا تشوفوا بعض وقت ما تحبوا، أنكم تبعدوا عن بعض، وتفقدوا كل طرق التواصل، على العكس، لازم تحافظوا على استمرارية علاقتكم بالتواصل والاهتمام، تبدأوا تكونوا موجودين بصورة أكبر، تتكلموا كل يومين، وتبعتوا لبعض بشكل يومي رسائل يكون فيها محبة وتقدير وامتنان، وكمان تكون بتتابع أحوال كل شخص، وتعرف أوضاعه إيه، ومفيش مانع نبسط بعض بميمز وكوميكس.

3.أنشطة مشتركة

طبعا، هيكون صعب تلاقوا أنشطة مشتركة بعد ما بقى صعب تتقابلوا، لكن ممكن توجدوا لنفسكم طريقة مختلفة تجتمعوا بيها على حاجة، ويبدو كأنكم عملتوها سوا، يعني مثلا ممكن تحضروا الحفلات الأونلاين مع بعض، أوتتفقوا على فيلم تشوفوه وتتناقشوه فيه، أو كتاب، أو حتى برنامج تتابعوه، وممكن تبقى لعبة أونلاين برضه، أو تتفقوا على تحدي، المهم تلاقوا الوسيلة أو النشاط اللي تكونوا أنتو الاتنين مهتمين بيه وتعملوه مع بعض.

وإذا كان صعب تلاقوا اللي يجمعكم ممكن تحفزوا بعض على الحاجات اللي مهتمين بيها، يعني تكونوا دافع أن كل طرف يتعلم الحاجة اللي بيحبها، ويطور نفسه، ويستغل وقته بطريقة مناسبة.

4.تقدير الانشغال

في القترة دي، ولأنه كل شخص بيمر بوضع جديد، فهيكون منشغل بكيفية تسيير أموره في الوضع ده، أو بيضطر يشتغل من البيت، وممكن يكون مهتم بأمور تخص أسرته او وضعه الاقتصادي والصحي في الفترة دي. المهم إنكم تراعوا الانشغال اللي ممكن أي طرف يقع فيه، ومتكونوش دايما متوقعين اهتمام مبالغ فيهن ومتطلبوش وضع مميز، على العكس، المفروض تكونوا مقدرين ممش عبء على بعض.

5.قربوا لبعض أكتر

via GIPHY

"نقرب؟!!!" ممكن تبقى كلمة مريبة في الأوقات دي، لكن الهدف أنه دماغكم تكون قريبة من بعض، وقادرين تفهموا بعض، وتتناقشوا في المواقف المختلفة اللي ممكن تتعرضوا لها، بمعنى أنه في أوقات الفراغ دي، ممكن تعتبروها فرصة تتكلموا بشكل جدي وحقيقي عن موضوعات تخص علافتكم، او افكار عامة عن الحياة، تفكروا في اختلافاتكم والأمور اللي بتجمعكم، ده مش بيتوفر مع ضغط الحياة اليومية والشغل، وبالفعل هتكونوا أقرب لبعض وكل طرف فيكم قادر يستوعب التاني.

6.خطط مستقبلية

مهما بدا الوضع قاتم وسيء، الأمل في أنه كل شيء بنمر بيه هو مرحلة وهتعدي لازم يكون موجود وباقي، وعشان كده، ممكن تبدأوا تخططوا للحياة اللي هتجمعكم في المستقبل مع بعض، ومتيأسوش من أنه ده يحصل، وتهتموا أنكم تكونوا إيجابيين قدر الإمكان وتساعدوا بعض على تحقيق أحلامكم.