إزاي تتجنبي الخلافات الزوجية في فترة العزل الصحي

الطبيعي، إننا نكون قادرين نتخطى خلافاتنا والمشاكل اللي تحصل ما بينا في أي وقت، وأنه المشكلات الزوجية العادية اليومية، هي جزء من علاقة أي زوجين، وبيتم التعامل معاها من غير أي تعقيدات أو توتر وقلق كبير، لكن في خلال فترة العزل الصحي الأخيرة، اللي بقينا كلنا مجبرين عليها، يبدو أنه الوضع بقى أصعب.

يمكن التواجد في البيت لفترة طويلة كلنا مع بعض كزوجين، أو في حالة وجود أطفال، بيخلي التعامل مع المشاكل من غير حكمة، خاصة، لو كان بيرافق ده حالة من القلق والغضب من فيروس مجهول مش عارفين ممكن يأذي حد بنحبه أو لأ؟ وكلنا جوانا مشاعر مختلفة ومتضاربة، وكل يوم نصحى على خبر مختلف.

وتواجد الأسرة في البيت لفترة طويلة، ومع أوقات الفراغ الكبير بيتسرب الملل ليومنا، وبيكون التعبير عنه بالخناق واختلاق المشاكل، أو الطلبات الكتير المتعلقة بإعداد الأكل أو المشروبات والمسليات، واللي في بيوت كتير بتخلي الست وحدها تتحملها، وده معناه حدوث خلافات ومشاكل.

تعرفي على: 6 لحظات بسيطة لكن مهمة وملهمة في العلاقات العاطفية 

حل الخلافات الزوجية

الوضع الحالي بيقول إننا لازم نمتلك طريقة جديدة في إدارة يومنا، والتعرف على الوسيلة اللي تخلينا نقدر نستفيد بيه، ونتجنب حدوث الخلافات، ونقلل من الطاقة السلبية داخل بيوتنا، لأن الأجواء مشحونة بالفعل بكتير من القلق والتوتر والتخبط اللي ممكن يفسد علينا حياتنا.

وعشان تتعامل مع الخلافات في وقت العزل الصحي، وطول فترة تواجدك في البيت مع زوجك، ممكن تجربي المجموعة دي من النصائح والطرق اللي هتخلي الموضوع يمر بطريقة سلسة أكتر، ويجنبكم تخسروا علاقاتكم وتعيشوا أيام أفضل مع بعض.

التخطيط

مع الوضع الجديد، من الأفضل أنكم تتفقوا على خطة تعدوها مع بعض، وتقسموا يومكم من خلالها، فإذا كنتم بتشتغلوا من البيت لعدد ساعات معين، فيتم احترام حساب الساعات دي في الجدول اليومي وتحاولوا يكون في نظام واتباع للأنشطة اللي هتضموها لساعات يومكم، بشكل صارم وحازم لحد كبير، ومنسيبش 

الأنشطة

أهم حاجة لازم تكون موجودة في يومكم، مجموعة من الأنشطة اللي هتتخلل ساعات اليوم نفسه، سواء، في جود أطفال أو لأ، يعني ممكن تخططوا لوجود فقرات في اليوم، وميكونش مجرد ساعات في اليوم بتجري ورا بعض، عشان على الأقل الملل ميتسربش لليوم، وينتج عن ده خناقات كتير، أو نسيب نفسنا لأفكار سلبية ومؤذية.

من الأنشطة اللي ممكن تخططوا لها، تتفرجوا على فيلم معين، أو يكون في ساعة لممارسة الرياضة واليوجا أو الرقص، وإذا كنتم في مجال يسمح بعدم الاختلاط بكتير من الناس، من الممكن تعملوا تمشية بسيطة يومية، أو تتشاركوا في عمل وجبة مع بعض، وتختاروا تقرأوا كتب أو تتعلموا حاجات جديدة، أو تشاركوا أطفالكم اهتماماتهم ولعبهم.

تقسيم المهام

أعباء المنزل المتعلقة بإعداد الوجبات طول اليوم من أكل ومشروبات وتسالي، غير التنضيف والتطهير المنزلي، مش المفترض أنها تكون مسئولية طرف واحد، فوجودكم مع بعض كزوجين معناه أنكم تتشاركوا كل شيء، فحد يقوم بإعداد الأكل، وطرف تاني يتولى مسئولية التنضيف، وهكذا بالتناوب، عشان يخف العبء من على طرف، ويكون في وقت للكل أنهم يقضوا وقت مريح.

مساحة خصوصية

وجودكم طول الوقت مع بعض في البيت، مش معناه إلغاء للمساحات الشخصية، وانه كل طرف متاح طول الوقت، على العكس، في الفترات اللي زي دي من الأفضل انه يكون ضمن جدولكم اليومي ساعات أو وقت مخصص لكل طرف يختلي فيه بنفسه، ويعمل اي نشاط يناسبه، ويتم احترام المساحة الشخصية دي، لأنه هيكون وقت يقدر يستعيد فيه طاقتك ويعمل لنفسه حاجة بيحبها، فيكون قادر يدي باقي الأطراف.

وقت للحديث

من المهم، أنه كل فترة تختاروا وقت تتناقشوا فيه مع بعض في كل الأمور اللي تخصكم، يعني تتكلموا عن الخلافات وإزاي تحلوها، والأفكار المتعلقة بالمستقبل، عشان تدوا لبعض الأمل، وتبطلوا تلوموا بعض، والأفضل كل واحد يعبر عن نفسه وعن الطرف التاني بشكل إيجابي وفيه حب وامتنان.

الخلافات الزوجية في أي وقت هي معضلة الأزواج الحقيقية، والتعامل معاها ، خاصة في فترة العزل الصحي الحالية، محتاج منكم مجهود أكبر وقدرة أكتر على تفهم بعض.

اقرئي أيضا:

في وقت العزل.. 6 نصائح تحافظ على علاقتك العاطفية 

دليلك للتعامل مع العلاقات التوكسيك

7 طرق تستعيدي بيها حياتك العاطفية بعد الطلاق